عبّر المحامي عماد مطران على صفحته على فايسبوك عن حلم وصرخة زحلية كامنة في قلوب اهالي زحلة وتصف مشاعر الكثيرين منهم وطموحاتهم لمدينتهم التي يحبون ويتمنون رؤيتها في مصاف المدن الرائدة سياحياً كما كانت دوماً، واختصر مطران صرخته بهذه السطور:

بِحلَم بِلَيل زحلة صاخِب ومِليان حياة وأَمَل
بِتمَنَّا شوف صيف زحلة مِتفوِّق عَكِل المصايف اللبنانية
......
بشو بتِختِلف #زحلة عن إهدن والبترون وجبيل وكتير مناطق لبنانية عمرانة ؟؟
.......
من العاصمة عزحلة أقرب مِنَّا عكتير مناطق
مناخنا ونَسيمنا الصيفي رائِع بالنهار وبالليل
عِنَّا تلال عالية حَرام ما تِلمَح مَغيب الشمس
وكروم ودوالي منِتأَسَّف كيف ساكتِة بالليل
وسهل إِمتِدادو بيِستاهِل يعيش تَحت القمَر
وساحات بالأحياء بيِلبَقلا تُنبُض بالتَجَمٌعات
وشوارع لازم يِنسِجِم تاريخا مع الانفتاح
وبيوت قديمة بتِستحِق تُعمَر وتِستَقبِل زوَّار
وإِقتصاد يِزدِهِر ويَد عاملة تِمنَع الركود والبطالِة
.......
شو المانع يكون عنَّا zahle village ؟؟؟ ، أراضي وعِقارات عمدّ العين والنظر تابعة لَلرَّهبنات مُمكن إستثمارا مِن قِبَل زحالنِة متمولين ، وهِنِّي كتير كتار
شو الرادع سوق البلاط يصير مَتَلاً متل الجِمَّيزِة ، شارع سَهَر وكَيف وموسيقى يِجمَع الشباب اللبناني من كل المناطق ؟؟
لَي ما بيِتخَصَّص مركز تَجَمٌع مقاهي ومطاعم مَتَلاً متل الميدان بإهدن يِستقطِب السواح وكل اللبنانية يدوقو طاولِتنا الغنية ؟؟؟
لَي البيوت المهجورة ما بتِتحَوَّل boutique hotel وبتِبقا بخاصِيِّتا القديمة بس تِترتَّب وتِستَقبِل زوار المدينة باللياقة والحفاوة؟؟
كيف منِسمَح نروح نسوح خارج زحلة ، وبالمقابل ما يِجو ينبسطو عأَرضنا ؟؟
ولَي بَدٌو يكون في مستشفى بنص زحلة وعشارع الوادي ؟؟ والمبنى بالاساس تعَمَّر فندق
وَين المهرجانات؟ بالوقت لي قلَّعِت وفَوَّلِت بكتير مناطق
.......
وأفكار ما بتُخلَص ، بس وَينا ؟؟
.......
ما تقولو هَي واجبات البلدية ، أو الحق عالبلدية ، لانو ما بِفتكر البلدية بتوقِّف بوِج هَيك مشاريع حيوية بتِنعُش الانماء والإقتصاد الزحلي
ما فينا نِتحجَّج بالوضع الاقتصادي، لانو هيدا الوضع عكِل لبنان مش بس عزحلة ، وكل شي ماشي طبيعي بغير مناطق وقلال كتير المأَثَّرين ، وأصلن قبل تَرَدي الوضع ، كانت زحلة ذات الشي وبَعدا
ما فينا نقول : مِن جمعة نعَمَل مهرجان وكان فيه عَجقة ، أكيد مٌشكورين القَيِّمين وكان برنامج حلو ، بس مش كافي، لأنو زحلة لازم
تِحيا صيفية كاملة من ١٥ أيار لَ ١٥ أيلول
ما تجيبو سيرة الكهربا لِبتنقطع بالليل ، لأنٌو بغير مناطق أصلن ما في كهربا ، ومظَبطين أوضاعُن ومقََلعين
.....
شو ناقصنا ؟؟؟
مِش ناقِصنا إلاَّ #قرار و #طموح
مِش قرار زعيم ولا وزير ولا نايب ولا بلدية ... وأَصلَن ما بَقا مقبول نضَل ناطرينُن أَو مزَلَّمين لَحَدا عَحساب حياتنا ورفاهيتنا ونُموّ مدينتنا ومستقبل الاجيال اللاحقة
الناقِص بالحقيقة هُوِّي #قرار_الشعب
#عزيمة_الزحلاوي وخُروجو من القَوقَعَة لعايِش فيها ووَعيو إنو خِلِق بمدينة بتِسوا الدني
.....
لَكِل زحلاوي بِحِب الحياة : فَكِّر وعمول شي لأنو لازم تِعتِمِد مبدأ :::: #زحلة_ممنوع_تموت
صَرخة مِن القلب كِرمال مدينة بِعشقا وما بتِستاهِل شعبا يِترِكا عَم تدٌوب وما يحَرِّكا .....