تعليقآ على ما حصل صباح الأحد على مداخل زحلة من إنتشار مسلح وإطلاق نار قال الوزير والنائب السابق إيلي ماروني : قلنا من زمن إنو الدولة ما بتعيش مع الدويلة لأنو واحدة رح تلغي التاني والظاهر إنو الدويلة وتوابعها لغوا الدولة ومؤسساتها . وقلنا ما فيها الدولة تستهتر بهيبتها  وإنو تكون عم تتفرج عا يللي حصل بزحلة وجوارها  صباح الأحد من قواص وإنتشار مسلح  قدام عيون رجالها وما تتحرك شو ما كان السبب. ومش بس تعمل دولة عنا عا واحد حاطط فوميه أو شك بدون رصيد فبتتحرك الجحافل العسكرية للإعتقالات. وقلنا ما فيها الدولة تتعامل بمنطق الصيف والشتي تحت سقف واحد  فصرنا نشوف ناس فئة أ حرة بتعمل شو ما بدا وكيف ما بدا ووقت ما بدا وناس فئة ب ما بحقلها حتى  تولع ألعاب نارية . وقلنا القهر بولد الإنفجار ولإحكي عن زحلة إنو مش كل مرة بتسلم الجرة لأنو مرات الفعل رح يولد ردات فعل  وخدوا ساعتها عا إعلان مزرعة لبنان بمناسبة مئوية لبنان الكبير . واليوم بنقول يللي حصل مرفوض ومش مقبول وعلى يللي بإيدو الحل والربط يضبط جماعتو وهون بحب قول إنو صار معي إتصالات من مراجع قريبة من حزب الله عم بقولو الحزب ما خصو  هودي قرايب الراحل رحمه الله طيب الحزب يساعد السلطات على إعتقال المسلحين ساعتها بنصدق وبنصدق إنو عنا دولة مش بس علينا  وما في عنا صيف وشتي تحت سقف واحد  وعالسريع لأنو بلشنا نسمع بالفدرالية والتقسيم  من البعض وهودي ناس موجوعين  فخليهم يشعروا إنهم بدولة قبل فوات الآوان .